الا يالله تعدل مليت الحظ الردي لامال= تعدلها ونشرب عقب كاس المر من حالي
يحل الضيق لا حل الظلام وهجّعـت لـزوال=هجم جيش الهموم وقمت ابارز جيشها لحالـي
تمر سنين وتعاقب وانا صابر علـى ذا الحـال=غرابيب الهموم اللي على صدري برت حالـي
واذا طال السهر والفكر حلق بالهمـوم وجـال=طرى لي زول واحد ما لقيته بيـن الازوالـي
تذكرت العيون السود والمبسـم وحبـة خـال=على وجنه كما نـور البـدر لا كمـل هلالـي
و ثغر ٍ لا ابتسم فرق الـثـنـايـا تذهـل العقّـال=ولا شافه خفيف العقـل طيـر عقلـه الخالـي
بمردوع الشفا بلسم وطب الـي عذابـه طـال=الا ياحظ من يـروي ظمـاه بريقهـا الحالـي
اذا سلهم برمش العيـن قلبـي باتجاهـه مـال=على ما طوح النظره خفوقي معه ميالي
واذا حد النظر صوّب لقلبـي رمشـه القتـال=انا المقتول واعشق يـا عذولـي سهـم قتالـي
رمتني بالسهوم وصوبتني ليـن دمـي سـال= وانا من عقبها لاني صحيح ولاني بسالي
هنوف ٍلا مشى وجل ٍ سريع الخطـوه وبتـال=شبيه الجازي اللي مـا يصيـده سهـم بتالـي
صغيرة سن واهداب العيون الناعسات ظـلال=وشرطان الذهب تسدل على المتنين شلالي
اناظر جيدها واحسد عليـه العقـد والسلسـال=اناظر واذكر الله كل مـا حـد النظـر طالـي
هي الفتنه ولا يقوى علـى طغيانهـا رجـال=ولا انجب مثلها بيـن الاوادم صلب رجالـي
رفيعة مستوى بالعيب ماتحكـي بهـا العـذال=عفيفه ماتعـرض للـردى والقيـل والقالـي
يحقلها علـى كـل البنـات بحسنهـا تختـال=قلوب الغيد لا شافت حلاهـا تشعـل اشعالـي