الأجواد بين الناس مثل المصابيح = عون لمن ضده من الوقت ضداد
معهم لبيبان المعرفة مفاتيح = وقفل لبيبان الضغاين والأحقاد
عرفتهم يوم إني أقوم وأطيح = وكسبت منهم فايدة نصح وارشاد
وأصبحت ناصح للقلوب المناصيح = وأهديت أبو عمرين نصحي والإنشاد
يفنى الرصيد اللي في البنك ويبيح = وفزعة بني عمك مع الوقت تزداد
لا قلت ربعي يالوجيه المفاليح = صفوا معك بالحال والمال واعتاد
وصاروا معك يوم الليالي مشاحيح = وقت الرخاء تلقاهم أكرام وأجواد
اصبر لعوجاهم واهبها تساميح = ولا تجي لضعيّف الهرج طراد
قدم لهم في مجلسك هبة الريح = وترحيبة الضيفان تكفي عن الزاد
لا يبعدك عنهم صديق التمازيح = حلو اللسان اللي مسراته إبعاد
يلهيك عن ربعك بكثر التماديح = وإلى زهمته وقت الأزمات ما فاد

مانجمع الدنيا على شان ينقال = تجار ولاّ يجمعون الفوايد
ماقصدنا منها يكن نستر الحال= ولا إلى جانا في البيت رايد
يلقى تراحيب بعدها الشحم فال= فعل الرجال مقدسين العوايد
اللي على درب الخطاطير نزال= يوم الطراقي والقوافل قوايد
بيوتهم للضيف ممسى ومقيال = لو قال مير قالوا الخير واجد
من أجل يلقى ضيفهم شرحت البال = وسوالف تسوى بيوت القصايد
قوم نباهم نومس العم والخال = طاريه في المجلس على النعم زايد
يوم البخيل يموت ما ساق فنجال = عليه من فعل الجمايل كوايد
ما يدري ان الطيب ترويه الأجيال = وان البخل والمال والعمر بايد
وصلاة ربي عد ما ساق همال = وعداد ما نقرأ سطور الجرايد