نذر علي ماعقب ذا العار من عـار=وبْعذرهـن لـو طلّقونـا النساويـن
من صغرنا ننشد فلسطيـن الاحـرار=وبافواهنا ماغيـر علكـة فلسطيـن
يابنت يكفي ما سمعنا مـن اخبـار=مير اسكتي يابنت الاجـواد تكفيـن
الثأر.. واقسم بالـذي شـرّع الثـار=رب قضى في شرعه العين بالعيـن
عـلام غيبـان النوايـا والاسـرار=اللي طمن سابع سما .. سبع اراضين
لو تجري دماهم مثل جري الانهـار=او نمحي اسرائيل قاصـي ودانيـن
ومن عقبها نجمع درر كل الاقطـار=بمحمـد الـدره فلانوفـي الـديـن
لبّا عيون غمضت خـوف الاخطـار=ولبّـا خفـوق نثـروه ابعيـاريـن
لبّاحشاه اللي احتضن طلقـة النـار=ولبّا جسده اللـي خـذوه النياشيـن
في ظهر ابيه اقفى يدوّر لـه ستـار=وشقّوا ستاره واصبح الجرح جرحين
لايامحمـد وانـت صنديـد مغـوار=لكن زمانك فـات ماهـو بهالحيـن
وقتك مع ( عقبه وطـارق وعمـار)=مع رجـال همهـم نصـرة الديـن
اللي افتحوا بايمان وبعزم واصـرار=من داني المغرب الى قاصي الصيـن
احرار في حطين والقادسية لهم كار=واقفـوا بعـزم القادسيـة وحطيـن
لايامحمـد عقبـك الحـال منهـار=مير العـزا ثـارك خذينـاه ثاريـن
حنا اتفقنا من عقب شجـب ماصـار=امّا اعقلوا نستنكر الوضـع ونديـن
ياسين لاصرنا على ارواح الابـرار=يكفي دقيقة نوقـف حـداد ياسيـن
حنا جدانا سطوة الجار عـا الجـار=والاعلى اسرائيل ماحـن بساطيـن
ستين عام سلاحنا شجـب وانكـار=لين اسحبوا وجه العروبه على الطين
هم جرعونا الذل في كاس الامـرار=لابالله الا ذوقـونــا الامـرّيــن
برجولهم داسوا على مـش الازوار=وحنا نهز بروسنـا تقـل راضيـن
هم لبسونا العار فـي ذل واصغـار=هم اتركونا نخلـط الزيـن بالشيـن
هم برّكونا في مجاعـات واحصـار=هم خلوا الغاليـن فينـا رخيصيـن
هم ارغمونا مانْتًخطّـى ورى القـار=هم زلزلونا عقـب هـاك البراكيـن
هم طوعونا كننـا عمـي الابصـار=والى اذبحوا مسلم نقول . ايه مسكين
هم هتكوا عرض العرب ستر واجهار=هم طمّنوا بلحى الشيـوخ المسنيـن
هم لاعْجزوا برجال واطفال الاحجار=ساقوا لنا الحجة بـدون البراهيـن
ياربعنا يا احفـاد وافيـن الاشبـار=الـى متـى الاجـداد منـا بريّيـن
الى متى نتخلّـق اسبـاب واعـذار=الى متى واحنا على الثـار مقفيـن
الى متـى واحفـاد عبـاد الابقـار=لوما اذبحونا غدر متنـا مساجيـن
الحر مايوقـع علـى خربـة الفـار=والى وقع ماهـو بكفـو الجناحيـن
اكرم بنـي صهيـون نـذل وغـدار=لوهم يبون السلم ما اغتيـل رابيـن
تدرون ويش ارهبهم اقـلال واكثـار=اكثر من اللي شافوا بحرب تشريـن
وخلى الطوال من الفزع فيهم قصار=فرحة شهيد بضحكة الشيخ ياسيـن
هيا مشينا نرخص امـوال واعمـار=هيا نعيد امجـاد الاحـزاب وحنيـن
قد قلتها من قبل في بعض الاشعـار=ترى الذلول الطيبـة تـردف اثنيـن
متى تشوف العين عج الرمـك ثـار=وبنصرنـا نقبـل نهيجـن ملاييـن
يادارنـا جينـا واحنـا هـل الـدار=حنا هل الرايـة وحنـا السلاطيـن
جيناك يوم اقفت مراهيش الامطـار=وابطت حراوي المعتصم يافلسطيـن
اما خذينـا ثـارك كبـار واصغـار=ولا تبرقعنـا ســواة النسـاويـن