يارب مقفي الأزمنة والمقابيل = وكل ٍ خلقت ولوح الأرزق توّه
يا خالق جيل ويا مفني جيل = يا محتمي بيته ومهلك عدوّه
يا منزل بالحق للأرض جبريل = وحي على الصادق الأمين بهدوّه
يالله تجنبنا هل القال والقيل = مبدلة ود الملا بالشنوّه
قطاعة الساقة كبار التهاويل = اهل يا طيب فلان لولا ولوّه
بعدٍ عن الجهال عدلٍ عن الميل = والصمت حكمة واللغو به غبوّه
من الغباء مجاراة هزل الأقاويل = خبلٍ بما يطري عليه يتفوّه
أبعد وأشوم لرفقة أهل التنافيل = اللي لصحبتهم مذاق وطروّه
منحرين البل وذباحة الحيل = سعد الخطاطير الخماص اللفوّه
أهل تراحيب وتهالي وتسهيل = ولكل ضايق بال بسط وسلوّه
ومقندينٍ غالي البن والهيل = من غالي الأسواق مشرى نقوّه
خولاني يشرى لغالي المعاميل = من شان لاجا الضيف يلقاه توّه
بدلال رسلانٍ ملي نواحيل = يشدن لخفراتٍ حلاهن يتوّه
كواعبٍ ومخصراتٍ مثاقيل = في عشقهن كل أبلج له نحوّه
حلوات ريق راق عذب سلسبيل = عذب تسلسل من شفاه شفوّه
ترياق باس عماس رأسٍ له صهيل = من شدة الخرمة لجوج يدوّه
مثل الخضاب إليا إنسكب بالفناجيل = بكفوف غيد مترفات الربوّه
مع ماعطن الباسقات المحاميل = من حاليٍ مثل الثريا قنوّه
ولا مباكيرٍ غضاضٍ مناويل = مدللات عند راعي رعوّه
يسوقه قروم سلايل رجاجيل = معربين أنسابهم والعنوّه
والعود الأزرق مثل سحبٍ مظاليل = طيب يكود اللاش مبلغ شروّه
يشريه راعي الجود للجود تكميل = حرٍ لكسب المرجلة شب ضوّه
في مجلسٍ لأهل الأدب به تعاليل = أهل الشكالة والشيم والمروّه
أهل التقا الأبرار قوامة الليل = السالكين دروب هدي النبوّه
مكثرين السبحنه والتهاليل = وكلٍ عبى التقوى لنفسه عبوّه
غضوا البصر عن أمهات الخلاخيل = بنات حواء الفاتنات الغنوّه
وإستغنوا بما حلل الشرع تحليل = وقاية عن المحرم وسوّه
غاياتهم ماهي قريبة مداهيل = وأهدافهم ماهي دنيا دنوّه
تواقة للحور فوزٍ وتحصيل = بأوصافهن سمعوا المنوه ينوّه
وتقصوا الأخبار عنهن بتفصيل = وعن كل ما يلزم لنيل المنوّه
وليا الأمر يحتاج صملة مشاكيل = شجعان غير الله ما يخشون قوّه
لمواجهة ألد الأعداء المغاليل = النفس والشيطان وأبو لغوّه
متلغوي نفاق وغواية وتضليل = ويفسد بها بين الخوان الأخوّه
يا كل ذا لبٍ وشجاع وحلحيل = ولا كل برقٍ تشفق لطش نوّه
أعد للأعداء رهافٍ مصاقيل = لو كنت عود تعود فيك الفتوّه
إن كان صار الصبر والعزم لك خيل = وسلاحك إيمانٍ وهبت السطوّه
من لا يكيل إعداه ويزيد في الكيل = تسموا العدا فوقه ويسقط سموّه
وتمد له الأعداء خيوط المحابيل = إن هلك ولا عاش حي مشوّه
ومن لا أدرك المظهار قبل المداخيل = تضيق به الآفاق لو به ضروّه
ومن لا عرف نقض الحبال المفاتيل = عليه يابو حبل لفه ولوّه
لاصار مابه لا نعاره ولا حيل = ماجاز لك بأمره تسويه سوّه
هين الإرادة فاتر عزوم وحليل = ماله جدى لا إنظام كود يتأوه
ومن لا نهل من صافيات المناهيل = حكمة وعلم ومعرفة ويش هوّه
يعيش تبعٍ والعوارف دواليل = هشاش ماش مشاش مابه جروّه
ومن حل بطن السايله شاله السيل = وان كان ما خيّل خيال بجوّه
سماه لو مابه غيوم وهماليل = (سيل أسفل الوادي يجي من علوّه)
من عاش بالغفلة يجر المواويل = ولا شاف من دنياه ميل وقسوّه
لا بد من يومٍ بليا مراسيل = اللآهي يفاجا وهو في لهوّه
مازرعٍ إلا له حصاد ومحاصيل = وكلٍ ومحصوله على السوق جوّه
وهناك تثمين السلع والمكاييل = ووزن بقسطاس وعدل ورضوّه

يا هيه فق من سباتك واسمع العلم واف=اسمع وانا أنبيك عن هقواتنا وش عبن
يكفيك منا ثنين وصلوا اقصى المطاف=وقاموا بفعل منه عظمى الدول تكربن
ولا ما لاحظت سطوة لحظة الإلتفاف =ورباطة الجاش والإتقان لين ضربن
عن كوكب الأرض وينك لحظة الإرتجاف=نهار دس النعام الروس بين التبن
يا من تعاظمت واستغربت ثقل الخفاف = هذي الجواهر الى جن سوقهن كسبن
وكان إستثارك سمو النص معنى وقاف = نوادر آداب لاصحاب الأدب ينسبن
والمجد ما يرجي اللي مايعرف إعتراف = ومن لا يعرف الحقايق منه ما يطلبن
شم النوايف ماتبصرها عقول الكفاف = ومن لا هقى بالنوايد منه ما يقربن
يا من تجاهلتني من كاده الكود عاف= مواجه(ن) به تذل آماله ويغلبن
من الحجر يولد الصوان ماش إختلاف= والله خلق من حجر خلق وخلق من لبن
تعطى الكرامات أهلها الظاهرة والخواف=مكارم من كريم لأهلها يوهبن
أنا من أهل المكارم والتقى والعفاف= أهل نفوس على نهج الفضيلة ربن
أنا من اللي من الرحمة قلوب عجاف = لا ضدوا الضد صاروا له زوال وغبن
أنا من ابني شهر مروين حد الرهاف= ومخضبين النوافع يوم أنا آخو , وإبن
بين الثقلين صيت وهل فعول تشاف = وسطواتنا غير لا صاب السواطي جبن
ما نحتزم بالبنادق غير يوم الزفاف= نطرب بها أفراحنا وهن بنا يطربن
متعاهدين(ن) ما ننطح بالبنادق خلاف=خوات من شالهن للحرب ما يخطبن
ننطح بشلف ما يلحقها الظما والجفاف= بيدين أهلهن من كبود العداء يشربن
بالسيف والنافعي ورماحنا والشلاف= قرت حدود الديار ودرت أم اللبن
أسود غاب بهيبتنا الحمى ما يحاف= واليا زبنا الدخيل من المثاري زبن
والجار في جالنا له من شيمنا لحاف= وأنظارنا في حليلة جارنا ما صبن
والضيف يلقى البشاشة والقرى في الصحاف= سمن وسمين وعود أزرق وهيل وبن
وخوينا ما يكدر باله ولا يخاف = وبنا خيول العفو عن زلته ما كبن

يا الله من تطوف البيت حجاجه=يارب من لا نفد صبره ولا كلّه

يا من بحكمه مصاب أيوب وعلاجه=يا رب عالج نوايانا وبسم الله

الّليل ساريه يعرف قيمة سراجه=إللّي بلياه يخطي الدرب ويدلّه

والدلة إللّي بدون قناد وحواجه=تعاف فنجالها أهل الكيف وتملّه

والهرج تنسب عذاريبه لهرّاجه=والناس كلٍ وله منهاج وجْبِلّه

من لا حسب قبل مدخاله لمخراجه=يحتار في لحظةٍ حرجه ومِهْولّه

من يحسب المجد بن عم لهملاجه=لا خير في دق مفهومه ولا جلّه

ومن يحسب المجد سرد أوصاف غنّاجه=في جملة أبيات إباحيّة ومعتلّه

فضايل الشاوي المصلاح لنعاجه=لكن خذ يا اللبيب الرأي وافطن لّه

الرجل للمرجلة يا كثر دولاجه=والسيف لولا نصابه بارت السلّه

المجد للّي طريق الحق منهاجه=ولا يسوي سواة إلاّ على الملّه

المجد للّي طريق العيب ما داجه=وعن الخوي وبن عمه يقصر الزلّه

المجد للّي يحيط الجار بسياجه=شيمه ، شهامه ، مروه والوفاء دلّه

المجد للّي إلى ما إشتدت الحاجه=هانت على المعوز المحتاج في ظلّه

المجد للّي لضيفه يضحك حجاجه=غريب ولاّ قريب بخير ومدلّه

والمجد للّي إلى ما جات منعاجه=عدل عوجها ويرفأ العيب والخلّه

يا ناشد المجد وأنت قواك مِجْمَاجَه=ما هوب شفقٍ عليك المجد لا بلّه

المجد صعبٍ على شرواك معراجه=آفاقه وساع ما أنت بطيرها للّه

المجد دونه محيطٍ عاتي أمواجه=تغرق مراكب ردي الخال وتذلّه

المجد ماله ياكود موسع فجاجه=يا هيه خلّه لزبن الكايده خلّه

المجد خله لشيخٍ لابسٍ تاجه=التاج تاجه وعرش المجد عرشٍ لّه

خله لحاتم عبيده باني أبراجه=أقوال وأفعال منها أمجاده مطلّه

خله لحناش ملفى المدح وأفواجه=عليه الأمداح غرْ مزون مِنْهَلّه

المجد كوكب مداره عاليٍ فاجه=وصل مداراته الزيزوم واحْتلّه

والمجد له تم بدرٍ والدجى باجه=ينير حكمة وحلم ورشد في حِلّه

حناش جود ووجود وجاه ومواجه=حاله وماله ووقته فزعةٍ كلّه

له حجةٍ معْ دهاء الأخصام فلاّجه=وإن واجه إشكال عقده كايدٍ حلّه

بروق مجده تعسف اللّيل لعّاجه=تنادي إللّي له وشرواه متولّه

إن كان تيماء اشتهر بالغزر هداجه=وشمال كبد الجزيره منه مِبْتلّه

هداج دهر العبيدي برد ثجاجه=بلسم سقم كل كبد ويبري العلّه

يزيد برده لازاد القيض وهاجه=وتكثر وروده ولا يشكون من قِلّه

ألا يا الله من الزلة تاقاني=ومن الشيطان والغيظ تحماني
بك الله أستجير من الخطايا=بها لا أنطق ولا يشر بناني
إليك الله أمر من لا يبالي=يا لولا حلمي وصبري بلاني
وأنا أستغرب ولا أستغرب ولكن=عجبت لكون الأخرس مكلماني
وذا علم وذا فكر وفصاحة=تقمص حالة الأخرس عياني
صدق من قال ها الدنيا عجائب=دهاها يبلش وساع البطاني
ما راحت به لياليها تجي به=وتسوق ركابها بالخيزراني
وأنا اللي راوي منها وشابع=معايشها تجارب وامتحاني
ولا عينتها إلا آثام ولا=هموم تودع العاقل يعاني
ولا يبقى بها حي مخلد=وعاليها مصيره للطماني
وهذي من لياليها الملايل=بها تقدير داعيني حداني
ولكنها على ما قيل لقحت=بما لا كان في طي إحسباني
أحب أهل الوفاء والطيب وأشفق=على مخاوا العديم إليا دعاني
أعرفه ويعرفني عرف وافي=آجيه آمون ويمون إليا جاني
على زلات غيره كيف آلومه=وأنا اعرف الحصان من الحصاني
ومن لا لد لي عين إهتمامه=وأنا ناصيه مع عانيه عاني
على سلمه وطبعه وإنطباعه=لا ضاق الخلق منه ولا رزاني
أنا ما جيته مدور طماعة=ولا لي حاجة بالمودماني
على صيته معى الأجواد جيته=وعكس اللي سمعته شفت ثاني
مشاريهي على ذاتي كبيرة=لكن وجهي من اللوم يعناني
أنا إن ما صرت الأول صرت الأول=مع الأول ولي قدر وشاني
ولا لي في ذرى الأقصين حاجة=وأنا من عزوة تروي السناني
آطول بهم وآسولف واتفاخر=ليا صعبت على اللاش المعاني
أنا من إبني شهر والعز بالله=بنا تلقح عقول إنس وجاني
أنا من إبني شهر شهر بن نصرا=عريبين المناسب والمجاني
مواقفنا ليا قمنا تشرف=وواحدنا مع آلاف يباني
وسبع المستحيلات معروفة=وحنا إللي جعلناها ثماني
بنا يسلى الدخيل ويرجهنا=مهابتنا له حصون وأماني
ويلقى ضيفنا قدر وكرامة=ولا والله يضام ولا يهاني
نعم والله لو كان من النصارى=من يقصر في حقوقه مداني
حقوق الضيف والجار محسوبة=علينا من الكيان الى الكياني
نعز الجار والعاني نعزه=وجزاء سياتهم منا حساني
شيمنا حلم وصبر وتسامح=يا كود يهم بالعرض المصاني
فلا يبقي ولا يذر سخطنا=وتاكل نارنا قاصي وداني
وكان المجد معروف له أعضاء=لها تسند مهمات التفاني
فحن فكره وسمعه والبصيرة=وحن يمنى فعوله واللساني