اقرأ وهالكلمة عظيم وبيِّن(ن) مدلولها=الكلمة اللي صحّحت نهج البشر وعقولها
اقرأ قريناها ولكن لو وقفنا عندها=الله منزّلها على خير البشر ورسولها
اقرأ كتاب النور في عصر الظلام السرمدي=اقرأ نزل معها شعاع النور عند نزولها
اقرأ مفاتيح العلوم ومدخل ابواب النجاه=يوم الجهاله فوق راعيها تدقّ طبولها
العلم نور الفكر والأديان , والجهل الظلام=فإين العقول اللي على الغدرى تجي برجولها
والعلم لولا معلّم الأجيال ما قام ونهض=وإحنا معلمنا رسول الله مقرّ حلولها
قمّ للمعلم وفّه التبجيل وارفع منزله=يا مخرج(ن) ظلمة عقول الجهل من مجهولها
أنتم مصابيح الظلام وصانعين امجادنا=ما للثقال إلا الجمال اللي تشلّ حمولها
وأنتم على ايديكم يقوم الصرح ويعزّ البنا=حيّ الصروح اللي على ايديكم تقرّ أُوصولها
يا معلِّمين الخير ربّ العرش وملوك السماء=حقّ(ن) يصلون الصلاة اللي لكم قاموا لها
يا هيبة العالِم , ويا صبر الحليم وقوته=يالشمعه اللي تحترق حتى تضوِّي حولها
لو حاول الحُسّاد يطفون الشعاع وقيمته=عميت عيون الحاسدين وخلِّلت بكحولها
واليوم هذا أكبر مثال إنّ المعلم معتبر=لفتة وفاء والله يوّفق من سعى لحصولها
أستاذنا هزاع عاصرته وأنا طالب فصل=ثمّ(ن) رجعت أدّرس الطلاب بين فصولها
نعم الأدارة والرجل , نعم التعامل والعمل=أبٍّ حنون , وشجرةٍ ما يختلف محصولها
هذا الجزاء ردّ الجميل إمن زملاك الأوفياء=الله يبيّض في وجيه(ن) ما تقاس فعولها
وأنا بهالموقف تخالجني المشاعر واعتذر=إن كان ما عبّرت عن حاجه بغيت أقولها
الحفل وحضوره على راسي . وتقدير الحضور=ما ودِّي أنبِّش جروح(ن) في الحشاء مفعولها
فلا تلومون المدّرس لو بدا يضربّ بها=أخماسها فأسداسها , في عرضها في طولها
يمكن على شان إمتخرِّج ما لقى فرصة عمل=تخصّصه (حاسب) ومرتبة الشرف يسموا لها
انا الجريح اللِّي ليا منّه تغبّن واشتكى=يردها صوب الكريم , وينتظر محلولها
ما هو بنا وحدي معاي أخوان مثلي مثلهم=هذي رساله وأنت يا وجه السعد مرسولها
لا عند ( ابو متعب ) وابو متعب ليا قال وفعل=والكلمه اللي في اللزوم . (يقولها ويطولها)

المشاركة الأصلية كتبت بواسطة منووار سعيد الأحمري شاعري واستاذي صح الله لسانك العذب قصيده بتركيبه مميزه لا يتقنها سواك دمت بخير .