سلام يا صاحبي واحلى صباحيه = حبيت اصبح عليك ,, وجيت بالعاني
يا ميت القلب صوبي والملأ,,حيه = وانا على صحبتك ملزم وطمعاني
جيت اعتذر منك واطلبك السماحيه = رغم اني اللي على صحبتك ودعاني
خل اعتذاري نسويه افتتاحيه = ونلمع اوضاعنا ونزيد لمعاني
يا صاحبي طرت,, زمتني جناحيّه = صوبك وتدفعني الهقوات دفعاني
في رحلة(ن) مالها طاقم ملاحيه = واهبط على الساق وعلى روس كرعاني
انا دخيلك ,, بعيد عن الاباحيه = بيني وبينك بلاش يسير منعاني
الله لو لي على خمك صلاحيه = كان اتلقاك بيديني وذرعاني
ويسير من بعدها حزن ومناحيه = هذا ينوح ,,وهذاك يون وجعاني
يا صاحبي دام شايفها بجاحيه = انعاك في صحبتك من قبل تنعاني
نشد عن بعض والدنيا نزاحيه = واكرب على محزمي من حول ضلعاني
وارجع كما كنت في دنيا الفلاحيه = هذاك رزقي وهذا رزق ورعاني
مشاركة بواسطة:
سلام يا صاحبي
العرض العادي
